ಕೊರಡುಗಳ ನಡುವೆ ಕೊರಡಾಗಿ
ಮಲಗಿ, ಮುತ್ತಿಟ್ಟ
ಬೆಂಕಿಗೆ ಚಿಟಚಿಟನೆ ನಗು
ನಗುತ್ತ ಹೊಗೆಯಾಗಿ ಹಾರಿ ಹೋದರೆ
ಮೇಲೆ?
ಇಲ್ಲಿಲ್ಲ, ಇರಲಿಕ್ಕಿಲ್ಲ, ಇಲ್ಲೇ
ಇದ್ದಾರೆ - ಈ ಅಜ್ಜಿ, ನೆಲ
ಕ್ಕಂಟಿ, ಬೇರಿಳಿಸಿ ಆಳ ಆಳಕ್ಕೆ ಹೂತು
ಯಾರೂ ಎತ್ತಲಾರದಷ್ಟು ಹಟದಲ್ಲಿ ಕೂತು
ಇರುತ್ತಾರೆ ಈ ನೆಲದಲ್ಲಿ -
ಅನಿಸುತ್ತದೆ
ಅಜ್ಜಿ - ನೆಟ್ಟು ಬೆಳೆಸಿದ ಸಾಲು
ಮರಗಳ ಎಲೆ ಎಲೆಯ ಲೆಕ್ಕ
ಕೂಡ ತಿಳಿದವರು, ಆ ಹೂವು
ಹಣ್ಣು, ಹೀಚುಕಾಯಿಗಳ ಜೊತೆ ಪಟ್ಟಾಂಗ
ಹೊಡೆದವರು, ಅದರ ಮೇಲೆ ಕೂತ
ಹಕ್ಕಿಯ ಹಾಡು ಕೇಳುತ್ತ ಕಣ್ಣೀರು ಕರೆದವರು
ಮರ - ಹಕ್ಕಿ - ಹೂವು - ಹುಲ್ಲಿನ ಸಹಸ್ರ
ವಂಶ ಹಡೆದವರು
ನಾವೆಲ್ಲಾ ನಮ್ಮ ರೆಕ್ಕೆ ಬಲಿಸಿ
ಕೊಂಡು, ಬಾಯಿಗೆ ಹೊಸಹೊಸ ಭಾಷೆ
ಕಲಿಸಿಕೊಂಡು, ಪರಂಗಿ ನೆಲಗಳನ್ನು ಒಲಿಸಿಕೊಂಡು
ಹೋದರೂ ಯಾರಯಾರ
ಅಂಗಿಗೋ ತೇಪೆ ಹೊಲಿಯುತ್ತ ,
ನಮ್ಮ ಘನಹುದ್ದೆಗಳ ಪೀಪಿ ಉಲಿಯುತ್ತ,
ಸೊಂಟದಡಿ ಕೊಬ್ಬಾಗಿ ಬಲಿಯುತ್ತ
ಉಬ್ಬಸ ಬಂದು
ಮಾತ್ರೆ ನುಂಗಿ ನೀರು ಕುಡಿಯುತ್ತೇವೆ
ಮೇಲೊಂದಿಷ್ಟು ವ್ಯಾಯಾಮ - ಏರೋ
ಬಿಕ್ಸು, ಉರುಳುತ್ತೇವೆ.
ಅವರೇ ಬೆಳೆಸಿದ ಮಾವು
ಅವರ ಜೊತೆ ಸುತ್ತೂ ಮಲಗಿ
ಅವರ ಜೊತೆಗೇ ಹೊಗೆ
ಯಾಗಿ ಮೇಲೇರುತ್ತ ಗಾಳಿಗೆ
ಬೆರೆತಾಗ ಉಮ್ಮ
ಳಿಸಿ ಬಂತು ನೂರೊಂದು ನೆನಪು...
No comments:
Post a Comment